Thursday, November 15

मल्ल्या एक नंबरचा खोटारडा, दारुड्यांवर आणि खोटारड्यांवर विश्वास ठेवू नये : उद्धव ठाकरे

मुंबई, केंद्रीय अर्थमंत्री अरुण जेटली आणि विजय मल्ल्या भेटीवरुन सध्या जोरदार टीकास्त्र सुरु असताना शिवसेना पक्षप्रमुख उद्धव ठाकरे यांनी अरुण जेटलींची पाठराखण केली आहे. केंद्रीय अर्थमंत्री अरुण जेटली यांना आपण भेटलो हे मल्ल्याने इतक्या वर्षांनंतर कोर्टात सांगितले. काँग्रेसला या भेटीची कल्पना होती मग ते इतकी वर्षे दडवून का ठेवले, की काँग्रेसचा आणि मल्ल्याचा बोलविता धनी कुणी वेगळाच आहे? असा सवाल उद्धव ठाकरे यांनी विचारला आहे. एकमेकांचे पाय कापण्याचे प्रयोग दिल्लीत सुरू आहेत. 2019 ची ही पूर्वतयारी आहे. जे नकोत त्यांना आताच छाटा. त्यात सुक्याबरोबर ओलेही जळत आहे. जेटली यांच्याबाबत नेमके तेच घडताना दिसत आहे असं उद्धव ठाकरेंनी म्हटलं आहे.
विजय मल्ल्या एक नंबरचा खोटारडा आहे. दारुड्यांवर आणि खोटारड्यांवर विश्वास ठेवू नये, पण विजय मल्ल्या याने लंडन कोर्टात केलेल्या एका वक्तव्यावरून केंद्रीय अर्थमंत्री अरुण जेटली अडचणीत आले आहेत. देश सोडण्यापूर्वी आपण अरुण जेटली यांना भेटलो होतो. या भेटीत आपण बँकेच्या व्यवहाराबाबत तडजोड करण्याविषयी बोललो असा दावा विजय मल्ल्या याने लंडनच्या एका कोर्टात केला. यावर अरुण जेटली यांना आरोपीच्या पिंजर्‍यात उभे करण्याचे कारण काय? पण काँग्रेसने हे केले आहे असं उद्धव ठाकरेंनी म्हटलं आहे.
मल्ल्या हा आता आर्थिक विषय राहिला नसून राजकीय धोपटेगिरीचा विषय झाला आहे. मल्ल्याने आता लंडनच्या कोर्टात सांगितले की, ‘‘बँकांचे आपल्यावर कर्ज होते. थकबाकी भरायला आपण तयार होतो. तडजोडीबाबत मी बँकांना अनेकदा पत्र लिहिले होते, परंतु मला त्यांच्याकडून काहीच प्रतिसाद मिळाला नाही. त्यामुळे बँकांशी तडजोड करावी यासाठी आपण अर्थमंत्र्यांची भेट घेतली होती.’’ मल्ल्याच्या या विधानानंतर इतकी खळबळ उडायचे कारण काय? अशा प्रकारच्या भेटी होऊ शकतात व हे काँग्रेसला माहीत असायला हवे. ज्या पक्षात मनमोहन सिंग यांच्यासारखे जोरदार अर्थतज्ञ आहेत त्यांचा सल्ला तरी काँग्रेसने घ्यायला हवा होता असं मत उद्धव ठाकरेंनी व्यक्त केलं आहे.
तडजोडीचा मसुदा मल्ल्याने दिला होता व बँकांना तो मान्य नव्हता. त्यामुळे अर्थमंत्र्यांकडे दाद मागितली असे हे प्रकरण आहे. पुन्हा मल्ल्या अर्थमंत्र्यांना भेटला तो संसदेच्या दालनात. मल्ल्या हा खासदार होता व खासदार म्हणून तो संसदेत कुठेही वावरू शकत होता. संसद सदस्याचा तो हक्क आहे. त्यामुळे संसदेच्या मध्यवर्ती सभागृहात आपण मल्ल्या याला अरुण जेटली यांच्याशी बोलताना पाहिले होते, म्हणून जेटली हे मल्ल्या प्रकरणातील एक गुन्हेगार आहेत असे जेव्हा काँग्रेसचे एक पुढारी पुनिया सांगतात तेव्हा हसू आवरत नाही असा टोला उद्धव ठाकरेंनी लगावला आहे.
खरे तर काँग्रेस व भाजपने संसदेत ज्या चारित्र्याचे लोक निवडून आणले आहेत ते पाहता मंत्र्यांनी कुणाला भेटायचे व टाळायचे हा एक प्रश्नच आहे. पुन्हा मल्ल्या हा कर्ज बुडवणारा एकटा नाही. संसदेत असे कर्जबाजारी व कर्जबुडवे ‘एक से बढकर एक’ आहेत व ते खासदार म्हणून हवे तेथे फिरत आहेत अशी टीका उद्धव ठाकरेंनी केली आहे.
नीरव मोदीच्या एका कौटुंबिक सोहळ्यात राहुल गांधी हजर होते असेही समोर आले. म्हणजे मोदी याच्या पलायनामागे राहुल गांधी होते असे मानायचे काय? बोफोर्स प्रकरणात क्वात्रोची पळून गेला. सरकार व सीबीआयची मदत असल्याशिवाय क्वात्रोचीला पळून जाणे शक्यच नव्हते. हा काळा इतिहास सहज पुसला जाणार नाही असंही उद्धव ठाकरे म्हणाले आहेत.